4 hours ago
Swift News
ਬ੍ਰਿਟਿਸ਼ ਕੋਲੰਬੀਆ ਵਿੱਚ ਇੱਕ ਇੰਪੋਰਟ-ਐਕਸਪੋਰਟ ਕਾਰੋਬਾਰੀ ਮਹਿਲਾ ਨੂੰ ਅਦਾਲਤ ਦੀ ਮਾਣਹਾਨੀ ਦਾ ਦੋਸ਼ੀ ਪਾਇਆ ਗਿਆ ਹੈ। ਅਦਾਲਤ ਮੁਤਾਬਕ, ਔਡਰੀ ਵਾਂਗ ਨੇ 2019 ਵਿੱਚ ਲੱਗੀ ਪਾਬੰਦੀ ਦੇ ਬਾਵਜੂਦ ਰਿਚਮੰਡ ਦੇ ਪਾਰਕਰ ਪਲੇਸ ਮਾਲ ਵਿੱਚ ਲਗਜ਼ਰੀ ਬ੍ਰਾਂਡ ਲੂਈ ਵੁਈਤੋਂ ਦੇ ਨਕਲੀ ਉਤਪਾਦ ਵੇਚਣੇ ਜਾਰੀ ਰੱਖੇ। ਫੈਡਰਲ ਕੋਰਟ ਦੇ ਜਸਟਿਸ ਨਿਕੋਲਸ ਮੈਕਹੈਫੀ ਦੇ ਫੈਸਲੇ ਮੁਤਾਬਕ, ਇੱਕ ਪ੍ਰਾਈਵੇਟ ਜਾਂਚਕਰਤਾ ਨੇ ਗਾਹਕ ਬਣ ਕੇ ਵਾਂਗ ਦੀ ਦੁਕਾਨ ਤੋਂ 112 ਡਾਲਰ ਵਿੱਚ ਨਕਲੀ ਵਾਲਿਟ ਅਤੇ ਬਾਅਦ ਵਿੱਚ 212 ਡਾਲਰ ਵਿੱਚ ਇੱਕ ਸਕਾਰਫ਼ ਖਰੀਦਿਆ। ਦੋਵਾਂ ਖਰੀਦਾਂ ਦੀ ਵੀਡੀਓ ਰਿਕਾਰਡਿੰਗ ਕੀਤੀ ਗਈ। ਲੂਈ ਵੁਈਤੋਂ ਦੀ ਵੈੱਬਸਾਈਟ ਮੁਤਾਬਕ, ਇਸ ਦੇ ਅਸਲੀ ਵਾਲਿਟ ਦੀ ਕੀਮਤ ਲਗਭਗ 500 ਤੋਂ 1,400 ਡਾਲਰ ਹੈ, ਜਦਕਿ ਅਸਲੀ ਸਕਾਰਫ਼ ਦੀ ਕੀਮਤ ਲਗਭਗ 700 ਡਾਲਰ ਦੱਸੀ ਗਈ।
ਅਦਾਲਤ ਨੇ ਕਿਹਾ ਕਿ ਵਾਂਗ ਨੂੰ ਪਹਿਲਾਂ ਹੀ ਨਕਲੀ ਸਾਮਾਨ ਵੇਚਣ ਤੋਂ ਪੱਕੇ ਤੌਰ ’ਤੇ ਰੋਕਿਆ ਗਿਆ ਸੀ ਅਤੇ ਉਸ ਨੂੰ 7 ਲੱਖ 40 ਹਜ਼ਾਰ ਡਾਲਰ ਹਰਜਾਨਾ ਭਰਨ ਦਾ ਹੁਕਮ ਵੀ ਦਿੱਤਾ ਗਿਆ ਸੀ। ਇਸ ਮਾਮਲੇ ਵਿੱਚ ਲੂਈ ਵੁਈਤੋਂ ਕੈਨੇਡਾ ਸਮੇਤ ਕਈ ਲਗਜ਼ਰੀ ਬ੍ਰਾਂਡਾਂ ਨੇ ਮੁਕੱਦਮਾ ਕੀਤਾ ਸੀ। ਜੱਜ ਨੇ ਕਿਹਾ ਕਿ ਸਬੂਤਾਂ ਤੋਂ ਸਪੱਸ਼ਟ ਹੈ ਕਿ ਅਦਾਲਤੀ ਹੁਕਮ ਦੀ ਉਲੰਘਣਾ ਜਾਣਬੁੱਝ ਕੇ ਕੀਤੀ ਗਈ ਅਤੇ ਇਹ ਕੋਈ ਇੱਕ ਵਾਰ ਦੀ ਗਲਤੀ ਨਹੀਂ ਸੀ। ਵਾਂਗ ਨੇ ਸਬੂਤਾਂ ’ਤੇ ਸਵਾਲ ਚੁੱਕੇ, ਪਰ ਅਦਾਲਤ ਨੇ ਉਸ ਦੀਆਂ ਦਲੀਲਾਂ ਰੱਦ ਕਰ ਦਿੱਤੀਆਂ। ਹੁਣ ਅਦਾਲਤ ਵੱਲੋਂ ਅਗਲੀ ਸੁਣਵਾਈ ਵਿੱਚ ਸਜ਼ਾ ਜਾਂ ਜੁਰਮਾਨੇ ਬਾਰੇ ਫੈਸਲਾ ਕੀਤਾ ਜਾਵੇਗਾ।